مراجعة UFC 2

EA Canada تعود مجددا بالجزء التاني من UFC, بعد جزء أول كويس وكان مبشر للسلسلة.

سحر UFC هو قدرة EA Canada على انهم بيقدموا أحساس المباراة بكل تفاصيله حتى لو التفصيلة ديه صغيرة جدا وممكن متاخدش بالك منها. فهل UFC 2 بتقدم أحساس الجزء الاول؟ ده هنعرفه مع المراجعة ديه.

UFC 2 بتقدر بشكل ممتاز إنها تعيد صناعة التجربة اللي بتحسها وأنت بتشوف أي مباراة ولكن إنت اللي بتتحكم بواحد من الأتنين جوه الـOctagon. اللعبة عنيفة جدا و عن طريق الـVisuals الرائعة و الأصوات اللعبة بتكتمل, ده غير المحتوى و عدد المصارعين المتوفرين في اللعبة. على عكس الجزء الأول من السلسلة اللي كان ناقص محتوى بشكل كبير و اللعبة كان ممكن إنك تستلفها من واحد صحبك وتلعبوا كام ماتش و خلاص وضعف الـCareer Mode مضافش على التجربة خالص و جعل من اللعبة عبارة عن تجربة المرة الواحدة وخلاص أو الحاجة اللي ممكن تلعبها إنت و صحابك عقبال ما تجهزوا للعبة تانية على عكس اجزاء UFC السابقة اللي كان الواحد ممكن يشتري منها اتنين عشان يلعب مع صحابه. في UFC 2, الستوديو فعلا سمع للناس و قدم محتوى ضخم جدا بفوق الـ250 مصارع متقسمين على 10 أوزان وبكدة اللعبة بتقدم تنوع رائع وروح تنافسية جديدة.

الجزء الأول من UFC كان ممكن يبقى في مشاكل إن الواحد يتعلمه, ولكن الحاجة اللي نجح فيها الجزء ده إنك بتحس إن في ستراتيجية في المباراة و إنك لازم لما تجهز لحركة معينة تبقى عارف إنت هتعمل كده ليه و إيه عواقب كده الموضوع لم يكن عبارة عن Button Mashing و Spam Spam SPAAAAAAM!! لأ خالص إنت فعلا بتحكم تحركاتك حتى لو بتلعب بـJon Jones أو Anderson Silva إنت دايما معرض للخطر, لأنك مينفعش تضرب عشوائي ده هيكلفك كتير قوي. UFC 2 بقى بتقدر فعلا إنها تضيف على كده و تحسن من بعض المشاكل اللي كانت موجودة في الجزء الأول, المرة ديه في حاجات كتير بتقدر تتعلمها بطريقة أسهل و تبقى ملم بحاجات كان الواحد بيتجنبها في الجزء الأول عشان كانت مش واضحة.

المصارعين في اللعبة شكلهم ممتاز, على عكس طبعا لعب الرياضة التانية زي FIFA مثلا بتبقى من بعيد الوش ممحي شوية و في تفاصيل واقعة. في UFC 2 كل حاجة بأدق تفاصيلها و شكلها رائع جدا, الفرق بين الجزء الاول والتاني واضح جدا و بيجعل من اللعبة واحدة من أفضل لعب الرياضة اللي شوفتها من ناحية الـVisuals و تقديم اللي بنشوفه في المباريات بشكل قريب جدا في لعبة.

زي ما قولت الجزء الاول قدر انه يقدم تجربة الـMMA بشكل رائع, الجزء التاني بيحسن من كده بكتير بسبب الأهتمام بتفاصيل بسيطة جدا كانت بتوقع من الجزء الأول, المبارايات أحساسها بقى أحسن بكتير و ممكن تفضل لحد الجولة الخامسة وتبدأ تحس بإرهاق شديد بسبب حدة المباراة و فجأة تنهي المباراة بـKOعن طريق حركة غير متوقعة و تقوم تعمل فرح. القتال في اللعبة سلس جدا و سريع, المرة ديه الموضوع بقى أسهل في توجيه الحركات و الواحد أصبح مدرك أكتر هو هيعمل إيه, Mechanics اللعبة بشكل عام اصبحت سلسلة و أبسط من الجزء الأول.اللعبة قدرت إنها تبقى أوضح بكتير للي مش بيتابعوا عالم الـMMA قوي و غير مدركين بطريقة اللعب, لدرجة إنك بتقدر تحط ستراتيجية معينة بعد أول كام مباراة ليك.

اللعبة بقى فيها طرق جديدة لمساعدة اللاعب مع نظام الـGrappling, وديه ممكن تعمل جدل بسيط لمحترفي اللعبة على إنها بتسهلها جدا, ولكن على العكس النظام ده في محله جدا, لانه بيخليك مدرك أكتر و مع الوقت هتقدر تبقى ممتاز من غير الاعتماد على مساعدة اللعبة ليك. و برضه الحظ لسة بيلعب دور كبير جدا في بعض المواقف فـ لازم اللاعب يبقى اخد باله.

نظام الـPhysics الجديد و المحسن استطاع انه يقدم لحظات تاريخية لما بتعمل KO  *ياااااه لو Uppercut هتشوف العجب* لحد و لو الحد ده إنت عارفه, بتبقى لحظة فعلا أسطورية و رائعة جدا و واقعية بشكل, و هو ده سحر UFC اللي EA Canada أنا برفعلهم القبعة عليه بشدة, قدروا انهم يستوحزوا على سحر عالم الـMMA و يبقى موجود في اللعبة و تقدر تحس إنك فعلا بتفرج على مثلا Anderson “The Spider Silva” في واحدة من مباراياته الأسطورية.

UFC 2 ممكن تبقى مش قريبة لسلسلة Undisputed من ناحية اختلاف الاوزان في الضربات وساعات بتحس إنك بتهرج مع اللي قدامك مش بتضربه, ولكن Takedowns و Grapples أحسن بكتير من اللي كنا بنشوفه في سلسلة Undisputed وده بيعمل فرق شاسع ما بين السلسلتين.

طبعا الـVisuals زي ما قولت فوق الرائع و تفاصيل ممتازة زي الدم والكدمات, و حركة الكاميرا جوه الـoctagon بتدخلك في جو المباراة علطول وهي تجربة رائعة للعيون صراحة.

 نتكلم عن أكتر حاجة محبطة في اللعبة و لتاني لعبة على التوالي وهي Career Mode, للأسف ممل جدا, الفكرة على الورق كويسة قوي وهي إنك بتبدأ من Reality Show لحد ما توصل لأعلى حاجة, موضوع مفهوش زي بناية علاقات أو عداوات خالص. الميزة الوحيدة هي إنك تقدر تعمل Woman و تبدأ طريقك بيها. موضوع سيء جدا لأن فعلا مفهوش أي سرد قصة وأنت كلاعب بتحاول تبني أي قصة  عشان تقدر تستمتع بالموضوع.

UFC 2 بتضيف Ultimate Team, زي اللي متوفر في FIFA و Madden وصراحة أنا مش من محبي Mode ده قوي, ولكن صراحة ممتع شوية و أريح من Ultimate Team الخاص بـFIFA و مش عبارة عن سوق لازم ترمي فيه فلوس فوق تمن اللعبة, ولكن طبعا Microtransaction بتقدم اختصارات كتير جدا.

الصوت في اللعبة ممتاز جدا, ولكن التعليق سيء كلعادة و ساعات بيبقى out-of-sync و ممل.

UFC 2 بتقدم تجربة Gameplay ممتازة و مش صعب تعلمها وتنفيذها و ممكن يبقى في عناصر صعبة شوية ولكن مع الوقت هتظبط جدا, و
فكرة ان تم تسهيل حاجات كتير في اللعبة زي Transitions و Grapples و Takedowns ده مش شيء سيء خالص و اللعبة بسببه بقت Arcade-y بالعكس اللعبة كده بقت أوضح بكتير و اسهل لتعلمها ولكن ده مش بيخليها لعبة سهلة نهائيا. اللعبة ممتعة جدا بـVisuals فوق الرائعة و Animations ممتازة, مصارعين كتير و تنوع رائع في محتوى اللعبة, و الـOnline الخاص باللعبة على عكس الجزء اللي فات مستقر جدا وتقدر تلعبه و مش هتتعصب بنسبة كبيرة.

UFC 2 لعبة ممتازة لأي محب لعالم الـMMA ولازم تبقى عنده, EA Canada فعلا قدموا تحسينات وسمعوا لمحبي الـMMA و ده شيء واضح جدا في الجزء ده.