مراجعة Guns, Gore and Cannoli

لو كان حلم من احلام حياتك انك تحارب حشود من الـZombies في عالم The Godfather يبقي متقلقش خلاص Guns, Gore and  Cannoli بتسمحلك تعمل كده بالظبط. اللعبة من نوعية Run and Gun و مش هينفع تكون اتولدت في التسعينات او قبل كده و تلعبها و متفتكرش Metal Slug.

تم تطوير للعبة في Crazy Monkey Studios بالتعاون مع Claeys Brothers و ده ستوديو بلجيكي. فريق العمل يتكون من الأخين Benjamin وMatthias Claeys وهما مسئولين عن animation و art بشكل عام و Paul Rozie و هو مبرمج للعبة و طبعا تابع Crazy Monkey Studios  وSteven Verbeek العقل المدبر لـCrazy Monkey Studios.

القصة:

القصة بتحصل احداثها في فترة العشرينات في امريكا وفي الفترة ديه كان ممنوع بيع الخمرة فـرجال العصابات كانوا هما المنتج الأساسي للكحول  و انت بتاخد دور Vinnie Cannoli  اللي رئيس عصابة الـ Bellucis بيكلموا عشان يروح  Thug Town و ينقذ Frankie بتكتشف إن Thug Town اتملت Zombies و بتفهم إن ده تفسير الأخبار الغريبة اللي كنت بتقراها في الجرائد بتبداء تحاول توصل لـFrankie  وتوصله لرئيس العصابة *اللي شبه Don Vitto Coreleone  جدا بالمناسبة* وده  بيخليك تقابل عدد كبير من الأعداء اللي بيتنوعوا مابين رجال عصابة الـBonnies, ودول أعداء الـBellucis, للي كانوا خاطفين Frankie و Zombies بأشكالهم المختلفة و الجيش وفران عملاقة اتأثرت باللي اتأثر بيه الـZombies رحلتك لي الوصول لـFrankie بتكشفلك إزاي  Thug Town  وصلت لحالتها دلوقتي وعن خطة أكبر بكتير جزء اساسي منها عالم ألماني.

القصة مسلية بشكل عام وهتحس بانهم حاولوا يخلوها مميزة على قد مايقدروا ولكن المهم هنا مش احداث القصة قد ماهو طريقة تقدمها القصة مليانة References لي الافلام اللي اتكلمت عن عصابات الايطاليين من أول لحظة بتشوف فيها Mr Bellucio وتعرف إن هم حاولوا يخلوا شبه Don Corelleone واسم اللعبة في حد ذاته في إشارة لي The God Father  و مشهد “leave the gun, take the Cannoli” لحد ماتسمع Vinnie وهو بيقول Ya Filthy Animal  و بقيت الإشارات لأفلام زي Scarface اللي تم تصوره سنة 1932 اللعبة ناجحة جدا في انها تسليك بتعليقات ذكية ومسلية زي المرة اللي Vinnie  بيبدأ يتكلم فيها عن انه حاسس إنه عمال يقتل نفس الناس. المشكلة اللي بتقابل التعليقات ديه هي إن بعد فترة بتبقى سمعتهم كلهم فـبيبدأ يبقوا مملين.

Graphics: 

اللعبة الرسومات فيها بشكل عام مرسومة بالايد والـAnimation  كل ده كان شغل Cleays Brothers  وفعلا كله متعة للعين. الرسومات ليها طبع كرتوني مسلي جدا لكن بيحافظ على احساسك إن الاحداث ديه بتحصل في فترة العشرينات والكلام ده ينطبق على كل التفاصيل من العربيات للمباني ولبس الناس وطبعا السلاح اللي إنت بتستخدمه, من أكتر الحاجات اللي شدت عيني هي لما بتعمل Reload لي مسدس Revolver ولو نطيت في نص أو بداية الـAnimation هتلاقي الرصاص بيطير في كل حتة وده مبطلش يبسطني كل مرة شفته فيها مع التكرار بسبب تواضع اللعبة بشكل عام, في مسألة الإهتمام بالتفاصيل ده كان جميل.

Sounds:

المزيكا اللي كانت بتشتغل في اللعبة كانت أكتر من رائعة خاصةً إن هي كانت مثالية  لجو اللعبة والإحساس بالفترة الزمنية ده و كان في تعاون واضح مابين الصورة والصوت عشان تحس بأجواء اللعبة.

الـVoice Acting  بيحقق المطلوب منه بالضبط اللعبة كانت طالبة ناس تحسسك باحساس مسلي وشبه طريقة الكلام بتاعت أفلام المافيا القديمة وده بالضبط اللي بيحصل مابيحولش يبقى أكتر من ده وديه يمكن تكون أحسن صفاته .

Gameplay:

اللعبة عبارة عن Run and Gun والمطورين لما اتسألواعن وجه الشبه مابينها وبين Metal Slug علقوا إنها بالفعل كانت أحد اللعب اللي كانت ملهمة ليهم لما كانوا بيعملوا اللعبة وإنها اوحتلهم  بأفكار. اللعبة بتقدم محتوي ثري من ناحية أنواع الأعداء و إزاي  بيخلطوا مابينهم لأن فيه زي فرق مختلفة (على سبيل المثال الفئران ورجال العصابات, و إلخ… ) ده غير إن فيه أنواع مختلفة بداخل الأنواع ديه. اللعبة فيها أرْبع مستويات للصعوبة ولو اتلعبت على Normal بتقديم تحدي كويس جدا بس نصيحة ماتلعبهاش على Keyboard لأن ممكن تكسروا قبل ماتخلصها. اللعبة فكرة co-op فكرة كويسة جدا خصوصا إنه لو معندكش controllers خالص ممكن تلعبوا على نفس الـKeyboard زي Keyboard co-op أو flash games كده بتاعت زمان. اللعبة برضه بتقدم Boss Fights  بس هنا بيظهر عيب الـBoss Fights كان ممكن تبقى اميز لو كانت اللعبة قدمت الـMinibosses خصوصا إن اميز fight هو آخر واحد وأول جزء فيه يعتبر تكرار لاول Boss Fight فـبالتالي كان لازم يبقى في ابداع أكتر في الـboss fights ومن مشاكل اللعبة التانية إن مفيش إي طريقة احسين بيها شخصيتي على الاطلاق غير اني ألاقي سلاح جديد و الاسلحة اللي في اللعبة 10 و متحدد هيظهرولك امتي مفيش إي Leveling System ولا حتى طريقة أزود بيها Health أو عدد الـAmmo اللي ممكن يبقى معايا. اللعبة بتحصل في العشرينات وبتحافظ علي قاعدة ان كل الاسلحة من الفترة ديه لحد بداية النهاية لما بتقدم سلاح أقل كلمة توصفه هو إنه سلاح SCI-FI وكان إضافة رائعة ومسلية جدا بس خلاني أسأل ليه مفيش إي نوع من انواع العربيات أو المدافع أو المراكب اللي ممكن تتركب ودول كانوا ممكن يظهروا في شكل الـMini Bosses اللي قلنا عليها ولما تغلبهم تقدر تاخدها منه وتستخدمها ضد حشود من الأعداء زي Metal Slug و Mega Man مثلا, بس وجود headshots في اللعبة  مسلي خصوصا لما تجيب إتنين بطلقة واحدة من Revolver.

الحكم النهائي:

Guns, Gore, and Cannoli لعبة مسلية و ممتعة على قد الـRefrences اللي فيها وشكل الـArt الكرتوني المميز والمزيكا اللي فعلا ممكن لوحدها تعمل mood العشرينات وفيها Game Mechanics محترمة بنسبة لشكلها المتواضع بس بتعاني من مشاكل لما ييجي الموضوع لتنوع الـbosses والـmini bosses و مسألة إن مفيش إي طريقة فيها أعمل بيها Upgrade أو أحس بيها بمجهودي في اللعبة أو حتى إني اركب حاجة مسلية ومختلفة وماينفعش اركبها في إي حتة تانية وكل المشاكل ده ممكن يكون سببها إن Kickstarter اللعبة مالمش الفلوس اللي كان عايزها فـبالتالي اضطروا انهم مايعملوش حاجات كتير. بس هي في المجمل لعبة تستحق التجربة و ممتعة جدا.