تفاصيل جديدة مسربة عن Mass Effect 4

من خلال استبيان اتعرض علي بعض الناس اللي تم اختيارهم من EA بعض التفاصيل اتسربت عن لعبة Mass Effect 4 و جدير بالذكر ان نفس الحاجة حصلت مع Dragon Age Inquisition.

و طبعا المعلومات بتشير لتفاصيل كتير تخص القصة و الجيمبلاي , و المفروض ان الطابع العام للعبة حتي في القصة قايم علي الاستكشاف و الفكرة ان احداث اللعبة بتحصل في منطقة في مجرة اندروميدا و هي Helius Cluster وسط بعثات استكشافية عن كواكب جديدة تستوعب البشر و المفروض الاحداث دي بتحصل بعيدا عن احداث ثلاثية Commander Shepard لكن متحددش هل هي قبل ولا بعد احداثها.

المفروض ان بطل اللعبة بيقود بعثة استكشافية و من خلالها بيبني مستعمرات للبشر و بيجمع موارد لبنائها و بيبتدي يدرب و يجند مجموعات مرتزقة و يطور وحدات من الروبوتات و تبقي زي فرق يستخدمها للاغراض العسكرية و بيتم استغلالهم في بعض المهمات اسمها Strike Missions و اللي في بعض منها من الممكن يكون فيه COOP.

في اللعبة بيتم التواصل مع كائنات فضائية جديد و من هنا بيظهر فكرة الاستكشاف اللي بتخليك تتواصل مع الكائنات دي, و من خلال عمليات الاستكشاف دي المفروض ان اللي بيلعب هيكتشف مخطوطات للتقنيات الخاصة بالكائنات الفضائة دي و ممكن تساعدك في تطوير ادوات و اسلحة بشكل افضل.

عالم اللعبة من المفروض بيشمل حوال 100 مجموعة شمسية ممكن تزورهم و تبني مستعمرات كل مستعمرة بتتخصص في مجال معين ممكن يوسع القدرات اللي في ايدك , زي مستعمرات مبنية علي الاستطلاع و انك تلاقي Strike Missions جديدة و مستعمرات مبني علي استخراج المعادن من المناجم و هكذا.

من العوامل اللي هتساعد علي الاستكشاف في عالم اللعبة السفينة الفضائية الجديدة المتاحة لبطل اللعبة و هي Tempest والمركبة البرية Mako اللي هتساعدك علي اكتشاف سطح الكواكب و اللي من الممكن انك تعدلهم و تضيف ليهم تقنيات جديدة.

اللعبة من اهم الجوانب اللي هتعتمد علي اكتشافها و هي الـRemnant Vault اللي بتكون زي Dungeons منتشرة في عالم اللعبة و اللي من خلالها بتلاقي اثار قديمة لحضارات تخص الكائنات الفضائية و طبعا هتكون فيها مواجهات مع اجرائات امنية مشددة و كل Vault اصعب من التانية من ناحية الاجرائات دي و الالغاز اللي هتلاقيها فيها.

نظام المحادثات في اللعبة اكيد هيكون موجود لكن من خلال اللعبة هيكون اوسع و اكبر من اي لعبة قدمتها Bioware قبل كده و هيضمن تغييرات محورية في مسار الحوارات و اختيارات تغير الشكل العام للقصة و بتشكل برضو علاقتك بالفريق بتاعك زي ما اتعودنا في الاجزاء اللي فاتت.

اللعبة هتكون شاملة مميزات تخص الـMultiplayer زي Horde Mode عبارة عن COOP mode بين 4 اشخاص بيواجهوا مجموعات من الكائنات الفضائية كل مجموعة هتكون اصعب من اللي قبلها مع مجموعة مهمات لابد يتم تنفيذها و دا نفس اللي اتقدم في الجزء اللي فات.