تقارير جديدة ظهر من خلالها مواصفات الـNintendo Switch و اللي من الممكن تكون متوسطة الاداء

ظهر تقرير بيوضح من خلاله امكانيات جهاز الـNintendo Switch قبل معرض الشركة في شهر يناير.

المعلومات مصدرها موقع Digital foundry اللي وضح في تقريره امكانيات كارت الشاشة والبروسيسور المحتملة وأكدوا ان قوة ال CPU هتكون هي نفسها سواء كنت بتستخدم الجهاز في وضع محمول او بدونه وان المعالج هيكون شغال علي 1020 ميجا هيرتز لكل نواة في البروسيسور في كلتا الحالتين.

بالنسبة لل Embedded Memory وهي المسئولة عن نقل وتدفق البيانات من وإلي الذاكرة الرئيسية للكونسول وفي الحالة الافتراضية للكونسول هتعمل علي 1331 ميجا هيرتز وهتزيد في حالة استخدامك للـDock ل 1600 ميجا هيرتز لكن للمطور مطلق الحرية في استخدام الحد الأقصي من الميموري لو ده كان اختياره.

نيجي لإمكانيات كارت الشاشة وهي اللي مسببة لغط وجدل لان تردد الكارت والجهاز في وضع الكونسول  حده الأقصي 768 ميجا هيرتز في حين ان الكارت يقدر يوصل لتردد 1 جيجا هيرتز. والاغرب ان Nintendo قللت تردد كارت الشاشة ل 307 هيرتز في حالة الوضع المحمول عشان يتجنبوا درجات الحرارة العالية والوصول بالجهاز لعمر افتراضي مقبول وده معناه ان الجهاز في الوضع المحمول هيقيد كارت الشاشة بإستخدام 40% فقط من طاقته وادائه الافتراضي.

جدير بالذكر ان كارت الشاشة مش بيعتمد في تصنيعه علي احدث معمارية من شركة Nvidia في المعالجة الرسومية وهي “Pascal” لكن بيستخدم معمارية اقدم بعض الشيء تحت إسم “Maxwell” و  بتستخدم معالج رسومي محمول اسمه Tegra. الامكانيات دي تعني بلا شك ان الجهاز هيكون علي اقل تقدير 1 TeraFlop والتيرافلوب هوا الوحدة اللي بنقيس بيها القوة الإجمالية لأي معالج رسومي والحد الأقصي من البيانات اللي تقدر تتدفق فيه خلال الثانية الواحدة وفي حين وجود مشروع زي الـScorpio ودا هيتعدي ال 6 TeraFlop او الـPS4 Pro بقوة معالجة 4.2 TeraFlop او حتي الـPS4 العادي 1.8 TeraFlop و نقدر نقول ان الـNintendo Switch امكانياته محبطة إلي حد ما اذا صحت المعلومات الموجودة في التقارير.

شركة Nintendo هتعلن بشكل رسمي عن امكانيات جهاز ال Nintendo Switch خلال فعاليات مؤتمرها في شهر يناير يوم 12 بالتحديد … وهيعلنوا فيه طبعا عن سعر الجهاز والألعاب اللي هتصدر معاه والتاريخ المتوقع لإصدار الجهاز هيكون غالبا في شهر مارس القادم.