Khalid AhmedDiablo 3 من اكتر العاب 2012 اللي ممكن نقول عملت ضجة و اتعرضت انتقادات لاسباب كتيرة و اخطاء وقعت فيها Blizzard.
في خلال الفترة اللي فاتت Blizzard نفذوا خطوات كتير في سبيل تصليح الغلطات اللي وقعوا فيها و الصراحة الخطوات دي بعد لما اطلعت عليها بعد غياب كبير لقيت انها فعلا خطوات في الطريق الصح, مع الـExpansion pack الجديد Reaper of Souls ممكن نقول ان في اضافات مهمة و جديدة خلتني شخصيا في اليومين اللي فاتو اللعبة واخدة حيز كبير من وقتي.
القصة:
Reaper of Souls يعتبر اضاف للقصة الفصل الخامس من احداث اللعبة ممكن نقول ان مفيش للاسف احداث كتير نتكلم عنها, و اللي اتفرج علي اول trailer للعبة ممكن يكون عارف الشكل الاساسي للاحداث.
بعد نهاية الفصل الرابع في احداث اللعبة الاساسية Tyrael قرر انه يخبي الـBlack Soulstone بعيد تماما عن اي حد سواء بشر ولا Demons و لا Angels و بيحصل ان Maltheal Angel of Death بيظهر عشان ياخد الBlack Soulstone و يبتدي يستعد لتدمير البشرية و الـArch Angels تاني.
طبعا اللي شاف الـTrailer الاولاني ده اكيد استنتج او عارف كل الاحداث اللي تخص اللعبة و للاسف الشديد الاحداث مبتطورش تماما عن كده غير النتيجة اللي بتوصلها في الاخر و اللي بتبقي متوقعة بشكل كبير.
صحيح كان في وسط الاحداث حاجة مهمة بتحصل و مرتبطة بشكل كبير بواحد من اهم احداث الجزء الاول بس بنلاقي انها سواء قبلها ولا بعدها عرض الاحداث مكنش مرضي اوي.
علي رغم من كده المدينة اللي بتحصل فيها الاحداث كلها اللي هي Westmarch ضمنت للناس اللي اتضايقت من ان Diablo 3 مكنتش فيها الروح بتاعت الجزء التاني اللي كان فيها شوية شر و غموض و فيها زي Dark Atmosphere هشوفوا تاني الاحساس و الجو ده.
الاماكن و الوانها و و الجو العام بيدلك فعلا الاحساس اللي المفروض الاتجاه بتاع الاحداث توصلهولك. علي رغم ان دي ميزة حلوة جدا بس لو كان تم استغلالها مع قصة ليها احداث بتطور بشكل مقبول كنا طلعنا بقصة بشكل عام حلوة.
الجيمبلاي:
اللي شاف كلام عن القصة واضح جدا انها للاسف كانت جانب سلبي كبير في Reapers of Souls, بس اللي اتضاف للجيمبلاي ممكن نقول انه كان العكس و ايجابي بشكل كبير.
بداية بعيدا عن Reapers of Souls و دي يمكن حاجة متاخر جدا اني اعبر عن اعجابي بيها, كل اللي Blizzard قامت بيه في الفترة اللي فاتت عشان يحسن تجربة اللعبة يحترم جدا سواء باضافة الـParagon System او انهم لغوا الـAuction House اللي كان اتسبب في حالة كسل كبيرة جدا عن ناس كتير و خلو اللعبة دلوقتي عبارة عن انك تعتمد علي نفسك و تلعب عشان تجمع Items بنفسك او تجمع المكونات اللازمة لانك تعمل اسلحتك بنفسك. دا حاجة ممتازة جدا و زي ما قلت اتاخرت جدا في اني اطلع عليها و اقول رايي عنها.
المهم بقي ايه اللي اتضاف للعبة؟؟ اولا الـLevel Cap بتاع اللعبة اترفع لـLevel 70 و كل Class بقي ليه Skills جديدة ممكن تخليك ترجع تلعب تاني و توصل لـLevel 70 و تفضل تلعب بالـCharacter بتاعك لمدة اطول شوية.
يعني الـMonk اللي انا بلعب بيه اتضافله Active Skill جديدة و هي Epiphany اللي بتسمح بانها تعمل شحن اسرع للـSouls و طبعا في تغييرات كتير حصلت مع بقية الClasses في الـStates بتاعت كل Skill لزوم التوازن.
طبعا في صعوبة جديدة اضافت و هي Torment ممكن من خلالها تضمن انك بعد لما توصل لـLevel 70 انك يبقي في تحدي اكتر في الـAdventure Mode اللي هتكلم عنه قدام و كمان تضمن ان يقعلك اسلحة Legendary اكتر.
في Class جديد اتضاف للعبة و هو الـCrusader اللي هو قريب من Class الـPaladin اللي كان في الجزء التاني. الصراحة لما لعبت بالـClass ده لقيته ممتع جدا , مميزاته في انه بيقدر يشيل اتنين Two Handed Weapons في نفس الوقت تخيلوا كمية الضرر اللي ممكن يعمله؟ او ممكن تشيل Two Handed Weapon و معاه Shield في نفس الوقت.
الـClass بيقدم برضو شوية Skills حلوة جدا و ميزتها انها غشيمة حبتين :D و بتخدمك علي كذا مدي سواء بقي Close Range او Mid Range ,Skills بقي زي Falling Sword و Fist of the Heavens و طبعا في Skills تانية بتخلي الـClass ممتاز جدا لو هتقدم دعم لاي حد معاك و انت بتلعب.
شخصيا مستني بس اوصل الـ Character لـLevel 70 و اشوف الـDamage Per Second لما امسكه اتنين Legendary Two Handed Weapons… هيبقي Overpowered قوي :D.
اللعبة برضو قدمت Artisan Shop جديد بيقدم ميزة حلوة جدا و هي انك ممكن تعدل علي الاسلحة اللي معاك و تعملها Enchanting بحيث لو معاك سلاح عليه Cold Damage و عاوز تبدله مثلا بـDamage عادي او Fire Damage هتلاقي ان الـShop ده بيوفرلك الامكانية دي غير ان كمان ممكن تغير شكل الـItems بتاعك و الموضوع ده بيفتح بشكل كبير امكانية ان الـCharacter بتاعك يبقي مميز و مختلف باحتمالات كتيرة جدا.
كل اللي فات ده حاجة و الـAdventure Mode حاجة تانية تماما. اعتقد الميزة الاساسية و الاهم و الافضل و الامتع كان الموود ده, و اللي نوعا ما بيعتمد علي انه يخليك ادام محتوي مش بيخلص. فكرة الموود قايمة علي ان اللعبة ليها 5 acts كل act وفرلك مناطق كتير وسط القصة انت اترددت عليها.
علي سبيل المثل ممكن من خلال الـ Adventure Mode تروح لـAct Two و بتلاقي نقول مثلا 10 مناطق كانوا في الـAct دا, بيطلب منك تروح ل 6 مناطق بخليك تخشهم علي انهم Dungeon و يطلب منك تخلص تحديات و Bounties مختلفة اللعبة بتنتجها بشكل عشوائي و مع كل مرة بتقفل و تفتح فيها اللعبة و قليل لما تلاقي تحدي او Bounty اتكرر. و بتلاقي كمية Loot عظيمة من الـAdventure Mode و شخصيا مع كتر التحديات و الـBounties مزهقتش تماما اني اعد العب اكتر و اكتر.
تخليص بقي Act معين من التحديات و الـBounties اللي فيه بيادي في الاخر انك معاك زي Chest لو فتحته برضو هيطلعلك Items جديدة و قيمة, و تخليص كذا Bounty بيدي زي مفتاح ممكن من خلال كذا مفتاح تفتح حاجة اسمها Niphillim Rift بتلاقي منها برضو تحدي جو Dungeon مطلوب انك تقضي علي Waves من الDemons و بتلاقي في الاخر Boss Fight.
بيوقعلك Items كتير برضو, يعني الـAdventure Mode عبارة عن حالة ادمان ممكن تجيلك من كتر الـLoot اللي هتجمعه و اللي هيفيدك في الـCrafting.
الـExpansion Pack يعني ممكن نقول انه ما اضافش كتير للجرافيكس يعني اللعبة مازلت محتفظة بنفس الجرافيكس هي هي بس الجديد ممكن نلاقيه في التصميم الحلو لمدينة زي Westmarch و الـBosses و الوحوش اللي بتقابلها و حركتهم اللي بصراحة كان حلو جدا.
التمثيل الصوتي مازال ممتاز و في Soundtrack جديد و الصراحة حلو جدا لما في وسط الـDungeons و كل مكان تحس ان ليه المزيكا المميزة.
Reaper of Souls الصراحة Expansion Pack حلو جدا, انا كا شخص اتضايق من كذا حاجة في اللعبة الاساسية و مع رجوعه للعبة مع التحسينات اللي حصلت في الفترة اللي فاتت و اضافة الـAdventure Mode و Class زي الــCrusader لقيت نفسي بقضي وقت اكتر و ممتع في اللعبة و مازلت عاوز اني العب اكتر. في الفترة اللي جاية في اضافات هترجع من Diablo 2 زي الـSeasons and Ladders اللي مع الـAdventure Mode هتكون اضافة ممتازة.
عيب الـExpansion pack الوحيد كان القصة اللي مضافتش ولا قدمت كتير بس غير كده اضاف للعبة حالة ادمان ممتازة.
