مراجعة لعبة Infamous: Second Son

من ساعة نزول البلاي ستيشن 4 في شهر نوفمبر اللي فات و الالعاب الحصرية اللي نزلت عليه في رايي الشخصي مكنتش بالمستوي اللي الواحد منتظره من Launch Titles لكونسول جديد. بس Infamous: Second Son كانت من الاسباب الكتيرة اللي تخليني منتظر اللعبة هي انها ممكن تكون اول لعبة حصرية هتقدم المستوي اللي الواحد كان مستنيه الـLaunch Titles بتاعت البلاي ستيشن 4. و كمان لعبة شفت من خلال الفيديوهات بتاعتها احتمالية الرجوع للمستوي بتاع اول جزء اللي بعتبره من افضل العاب البلاي ستيشن 3 الحصرية اللي لعبتها  و رجوع المستوي ده بيجي بعد الجزء التاني اللي احبطني جدا مع Super Powers جديدة و بطل جديد و استعراض مبهر لامكانيات البلاي ستيشن 4, Infamous: Second Son بقولها من اول المراجعة بداية الحصريات الممتازة للبلاي ستيشن 4.

اساس القصة او الاحداث بشكل ملخص بتيجي بعد فترة من احداث الجزء التاني و بنتعرف علي ديلسن روو رسام الجرافيتي اللي بيتعرض لحداثة ادت انه يبقي عنده قدرات خارقة او بقي Conduit زي ما بيقولوا في اللعبة.

بعد الحادثة دي بيروح هو و اخوه ريجيي ظابط الشرطة لسياتل عشان يدوروا علي ناس عندهم قدرات خارقة برضو زيه او Conduits وليهم علاقة بالحادثة اللي خلته يبقي زيهم. يبتدي يخش في دايرة صراع معاهم ضد منظمة شبه حكومية اسمها DUP. اللي مهمتها المفروض قايمة علي القبض علي الـConduits و يبعدوهم عن الحياة العامة في مدينة زي سياتل. بس الغريب انك بتلاقي انها منظمة بتستعين بالـConduits برضو اللي قدراتهم قايمة علي استخدام الاسمنت.

ديلسين روو كاشخصية يعتبر افضل المزايا اللي شفتها في القصة, شخص متسرع و كوميدي و اناني و عنده كاريزما غريبة. شخصيته فكرتني بشكل كبير بشخصية Deadpool مثلا من كتر السخرية اللي بتطلع منه علي اي موقف بيقابله ولا الجمل اللي بيقولها.

القصة بشكل عام كانت ممتعة و تخليك مهتم بالاحداث بس تتوصف بانها العادية و المتوقعة, للاسف الشديد مكنتش بنفس مستوي و قوة قصة الجزء الاول بالتحديد. الطريقة اللي اتبنت بيها علاقة ديلسن بالعدو الاساسي في اللعبة كانت عادية و تقليدية موصلتش لمستوي مثلا علاقة Cole بـKessler من الجزء الاول اللي كان فيها تعقيد في الاخر تخليك تاخد وقت عشان تجمع اللي حصل و اللي اتقال, الشكل العادي و التقليدي للاحداث دي اللي استمر طول اللعبة كنت مستني انه يتكسر بوجود ربط باحداث الاجزاء اللي فاتت او حتي يتجاب سيرة جماعة زي First Son, اللعبة من اسمها اللي هو Second Son يخليك تقول اه اكيد سيرة First Son هتتجاب في اللعبة, لكن للاسف معني الاسم ملوش تفسير في اللعبة و حاجة زي كده محصلتش, و يمكن دا اللي يخلي اي حد ملعبش الجزء الاول يلعب اللعبة عادي بدون انه يلعب الاجزاء اللي فاتت.

بس بشكل عام القصة مكنتش ضعيفة هي كانت عادية بس مش اكتر.

Gameplay:

Infamous Second Son قدرت انها تقدم بصراحة جيمبلاي ممتع جدا اتوفر فيه كل الاسباب اللي خلت الجيمبلاي بتاع الجزء الاول كان مميز جدا بالنسبة ليا.

بداية اساس الجيمبلاي كان في السوبر باورز اللي معاك سواء كانت النيون او الدخان و بيخلوك تحس بانك معاك قدرات Superhero بجد, علي رغم من المتعة و الادمان اللي هيجيلك و انت بتشوف الحركات التصميمات بتاعتهم هتلاقي فيهم توظيف ممتاز للـKarma system في اللعبة. و كل قدرة فيها اللي يميزها من ناحية طرق الحركة و التنقل من مكان للتاني و التعامل مع اي خطر ادامك.

الدخان بيديلك ضرر عالي ضد اي حد و القدرة علي خنق اي شخص من خلال قنابل دخان. النيون اساسه السرعة و الدقة بتلاقي نفسك بتستخدمه كانك بتضرب اشاعة ليزر و بتخليك تستخدم قنابل فسفورية عشان تساعد في شل حركة اي حد. مع اختلاف القدرات اللي بتستخدمها بتلاقي اختلاف في طريقة التنقل و الحركة, الدخان بيخليك تقدر تعمل نقلة لقدام و تحول جسمك كله لدخان و النيون يخليك تجري بسرع شديد جدا بتفكرني بسوبر هيرو زي سوبر فلاش.

استغلال بقي الكارما سيستم وسط القتال كان ممتاز ,يعني في وسط الكومبات ابسط مثال انك ممكن تلاقي حد استسلم و عليك انك يا اما تشل حركته و تسيبه عايش و تاخد Good Karma او انك تموته و تاخد Bad Karma. دا كان مثال بسيط جدا, انما لو عاوزين تشوفوا توظيف بشكل اوسع لما بتستخدم النيون بتلاقي ان ادامك يا اما انك تضرب في رجل اللي ادامك عشان تشل حركته و تسيبه عايش يا تضربه في راسه و يموت, و نفس الكلام مع الدخان من خلال القنابل اللي بتخنق الناس بيها.

افضل حاجة ما بين كل القدرات اللي معاك هي التوازن انت بتلاقي مميزات و عيوب سواء في الدخان او النيون و بتلاقيهم بيكملوا بعض بشكل كبير, و كمان التوازن ضد الاعداء نفسهم يعني بعد لما خدت القدرات بتاعت النيون حسيت اني هبقي قوي زيادة عن اللزوم و خصوصا بعد لما عملت التحديث اللي يخليني لما اعمل Aim يحصل زي تبطئ للوقت عشان اعرف استخدم الليزر بدقة شوية.لقيت انواع مختلفة و جديد من الاعداء و كمان الاعداء القدام بقو اصعب شوية في اني اشل حركتهم بضربهم في الرجل.

متعة استخدام القدرات الخارقة بتكبر برضو مع قدرة موجودة للدخان او النيون بتبقي زي سلاح خارق , مع تجميع Karma Points بتلاقي ان بيبقي عندك القدرة تعمل انفجار حسب القدرة الخارقة اللي بتستخدمها تنهي كل واحد ادامك و تبقي حل مثالي لانك تخلص من اي ازمة. القدرات اللي معاك اول ما بتاخدها بتعد تجمع في زي قدرات تحتية عن طريق تدمير زي Core Relays و تبتدي تطور فيهم.

زي الجزء اللي فات تطوير القدرات الخارقة بيتم عن طريق تجميع Shards اللي موجودة في الاماكن حواليك, و اثناء عملية التطوير دي بتلاقي ان في قدرات مبنية علي الKarma الخاصة بيك. الكارما سيستم بشكل عام بتدي امكانية كبيرة لانك تعيد اللعبة تاني عشان تشوف الاختيارات التانية اللي بتبقي ادامك و القدرات المختلفة المعتمدة علي الاتجاه اللي انت واخده, و خاصة ان اللعبة ليها نهايتين مختلفين عن بعض بيقدموا نتايج مختلفة في الاخر و مسار مختلف بتتجه ناحيته القصة.

الاماكن اللي حواليك او سياتل المدينة اللي بتحصل فيها اللعبة, المدينة تصميمها ممتاز و قريب بشكل كبير من الحقيقة.

في نشاطات كتيرة ممكن تعملها زي انك تدمر الCommand centers بتاعت الـDUP تلم الشاردز تدمر ابراج ارسال بتعمل تشويش علي الخريطة بتاعتك, المدينة زي الاجزاء اللي فاتت متقسمة لكذا منطقة بتعمل عملية تحرير للمناطق دي عن طريق انك تخلص النشاطات الجانبية  دي و تلم الCollectables  ,برضو في نشاطات بتأثر بشكل كبير علي الاتجاه اللي انت واخده في الكارما زي انك تنقذ ناس محبوسة او تواجه تجار مخدرات او انك ترخم علي الناس في الشارع بيلعبو مزيكا و اختيارات تانية كتير. استغلال قدراتك عشان تتحرك بيها وسط سياتل و انك تنفذ النشاطات الجانبية دي و تلم الCollectables كان ليه احساس عظيم و الواحد مزهقش تماما منها.

بس الافكار دي بنسبة كبير مش جديدة و كانت في الاجزاء اللي فاتت, و بتكرر هنا بس بشكل ظاهري يبدوا انه جديد زي مثلا المهمة اللي بتلم في تسجيلات صوت دي قريبة  جدا من مهمة العميل السري بتاعت اول جزء.

ييمكن دي حاجة مش هتخلي الواحد يقول ان اللعبة مملة او مش ممتعة بالعكس هي ممتعة جدا بس لو بصيت لحتة التطور من الاجزاء اللي فاتت للجزء ده ممكن نقول ان الافكار متطورتش بالشكل الكافي.

في حاجة شخصيا انا حسيت بيها ان مدينة زي سياتل في اللعبة للاسف مكنش فيها حيوية و الاحساس انها مدينة فيها حياة بالشكل الكافي زي العاب العالم المفتوح التانية. المدينة للاسف برضو واخدة نفس شكل قلة الحركة و الحيوية و الهدوء بتاع الاجزاء اللي فاتت بس اول جزء مثلا كان الواحد ادام مجتمع و مدينة منهارة فا كان الواحد مهتم بانه يشوف تفاصيلها. انما سياتل الواحد كان ممكن يشوف فيها الافضل مع فكرة الاحكام العرفية اللي متطبقة من الـDUP.

الانميز زي ما قلت في انوع مختلفة منهم بس الذكاء الاصطناعي الخاص بيهم كان للاسف متفاوت بشكل كبير, تصرفاتهم مش ثابتة علي مستوي معين. سعات يتصرفوا بشكل طبيعي لما مثلا تستخدم مثلا قدرة زي Smoke Charge يبعدو عنك علي طول بدون سابق انذار و سعات بيبقو اغبية شوية.

اللعبة الصراحة كانت فيها شوية جلتشات تضحك مش من نوعية الجلتشات اللي هي تبوظ تجربة اللعب زي سكايرم كده. بس اللي حصل معايا ان لقيت نفسي دخلت جوة الليفل ديزاين نفسه و واحد صاحبي اتفاجئ بعربية عايمة في الهوا.

الـBoss Fights في اللعبة الصراحة اللعبة كان ليها افكار مبتكرة و حلوة, سواء بقي في حركة الBoss نفسه و تفاعله مع المكان حواليك. و استغلالك للقدرات اللي معاك ضد الBoss. بس للاسف الـBoss Fights كانت قليلة و نوعا ما سهلة بس مميزاتها خلتني عاوز العبها و اكررها تاني.

في حجات تانية في اللعبة مينفعش اتكلم عنها تماما و دي سايبهالكم انتوا تشوفوها مع نفسكوا عشان كانت مفاجاة كبيرة ليا و عرضها فيه حرق جامد للاحداث برضو. بس لما شفت حجات زي دي قدامي احترمت سوني و Sucker Punch بشكل كبير علي حملة الدعاية بتاعتهم اللي محرقتش حجات زي دي و ضافت للعبة مفاجات كتيرة في النص التاني منها.

الفكرة ان Second Son قدمت جيمبلاي ممتع و سبب الامتاع ده القدرات الجديدة اللي بتخليك في حالة فضول انك تجرب كل حاجة جديدة بتفتحها و تطورها. اللعبة بتديلك متعة في انك تختار تبقي Super Hero ولا Super Villain. بس المشكلة اني لما ابص لموقع اللعبة وسط السلسلة كاساس و الطريقة اللي اتبني بيها الجيمبلاي هلاقي ان في نواحي كتير في نفس الافكار خصوصا في حيوية المدينة اللي انت فيها النشاطات الجانبية في افكار جديدة طبعا في دمج الكارما سيستم مع القدرات الخارقة اللي معاك.

الفكرة ان اللعبة يظهر انها عبارة عن ان Sucker Punch بيعملو زي اعادة انتاج او اعادة تطوير للفكرة الاساسية لاول جزء بالتحديد, و مستغلين هنا التكنولوجيا الجديدة اللي بيقدمها البلاي ستيشن 4.

Graphics:

 الصراحة Infamous: Second Son عبارة عن حالة ابهار بصري ممتازة. اللعبة من نواحي كتيير جدا عرفت انها تمتع عيني بشكل كبير.

مبدايا اللعبة شغالة علي ريليوشن 1080p و معدل اطارات كان غريب شوية هي متوسط 30 اطار في الثانية, بس ساعات بتعلي توصل ل40 و 50 كمان بس اللعبة ضمنتلي طول الوقت تجربة سلسة بدون انخفاضات تبوظ عليا استمتاعي بالجيمبلاي.

اول ما توصل سياتل المدينة اللي بتتعرض لمطرة كتير هتلاقي فيجوال ايفيكتس ممتازة. الاضاءة في اللعبة و انعكاساتها علي الاسفلت اللي لسة اثر المطرة عليه, الابلتيز بتاعتك بتعمل انعكاسات ممتازة و مبهرة. سواء النيون ولا الدخان بتلاقي كمية جزيئات بتطلع بتبقي منظرها حلو جدا و كل جزئ تحس انها مصدر اضاءة منفرد بنفسه. اعتقد اني ادمنت استخدام النيون  بسبب التصميم الخاص بالـSpeed Run. و اعتقد ان استغلال مؤثر زي الـLens Flare هيكتر استخدامه في الفترة اللي جاية كان برضو استغلاله في اللعبة كان ممتاز خاصة في الاوقات اللي في الليل.

حركة الوجوه في اللعبة كان مستواها عالي جدا و ادي حيوية لوشوش الشخصيات. الفيزياء في اللعبة كانت عظيمة انا ادمنت اني اروح عند بوابات التفتيش بتاعت الـDUP و ادمرها علي دماغهم.

Sounds:

تصميم الاصوات بتاع اللعبة كان برضو في اهتمام بتفاصيل كتير زي اصوات القدرات و انت بتستخدمها, اصوات الانفجارات و خصوصا لو دمرت عربية او بوابة تفتيش بتلاقي اصوات الحديد و الاجزاء اللي اتكسرت كل جزء ليه صوت لوحده زي صوت الحديد و هو بيخبط الارض مثلا.

التمثيل الصوتي في اللعبة مفهوش غلطة كل الشخصيات بدون استثناء التمثيل بتاعهم عظيم, ديلسون روو اللي عمل صوته هو تروي بيكر اللي اعتقد انه تقريبا بقي افضل ممثل صوتي في صناعة الالعاب بعد ادوار السنة اللي فاتت المهمة زي joel في Last of Us و Booker DeWitt في Bioshock: Infinite و jocker في Batman: Arkham Origins, الراجل ده ممثل عنده موهبة خارقة و خلاني مستمتع جدا بشخصية ديلسن في اللعبة. بصراحة موهبة تروي بيكر اللي ظهرت في اكتر من لعبة متقلش عن القدرات الخارقة اللي الواحد شافها في اللعبة.

الساوند تراك برضو كان الصراحة حلو جدا معظم المزيكا قريبة من شغل بانك روك او بوست روك و انا كا واحد انواع المزيكا المفضلة ليا هي الهيفي ميتال و الروك اقدر اقول ان استمتعت جدا بالساوند تراك بتاع اللعبة.

الحكم النهائي:

Infamous: Second Son لعبة من الضروري ان اي حد عنده بلاي ستيشن 4 انه يلعبها لانها فعلا افضل حصرية للكونسول ده لحد دلوقتي و دا المستوي اللي المفروض كان ينزل للبلاي ستيشن 4 من الاول.

اللعبة ممتعة جدا قدرت انها تقدم تجربة Super Hero ولا Super Villain ممتازة زي الجزء الاول علي رغم ان تقريبا 70% من الافكار في اللعبة عبارة عن افكار مشابهة للاجزاء اللي فاتت بدون تطوير في مضمونها بس استغلال قدرات البلاي ستيشن 4 خلي اعادة عرض الافكار دي حلو جدا و ممتع  عن طريق جرافيكس و ممتازة و تصميم صوتي مبهر.

سواء عجبك ولا معجبكش الجزء الاولاني او حتي لو كنت من الناس اللي اتضايقت من الجزء التاني لابد انك انت تلعب اللعبة لو عندك بلاي ستيشن 4.