الـPlayStation Neo ممكن يبقى أقوى من المتوقع

عالم صناعة الألعاب الجيل ده بيشهد تغيرات ضخمة جدا. بداية من الزيادة الضخمة للتعاملات الرقمية لحد التحديثات اللي بتحصل للجيل في نص عمره.

Sony أكدت قبل E3 انهم فعلا شغالين على PS4 محدث أو PS4 High-End و مايكروسوفت كشفوا خلال E3 عن Scorpio و عن مواصفات الجهاز اللي شكله هيبقى قوي جدا. وحسب الاشاعات والتسريبات يبدو إن الـScorpio هيبقى أقوى من الـNeo. ولكن, ممكن الفكرة ديه تبقى غلط و كل ده عبارة عن كلام.

خلال مقابلة Jim Ryan رئيس Sony Interactive Entertainment مع الموقع الفرنسي JeuxVideo, كان السؤال الموجه لـRyan هو إزاي Sony هتتغلب على فرق 2 TFLOPS ما بين الـNeo و الـScorpio. رد Ryan كان إن كل “الحقائق” اللي موجودة حاليا ديه مبنية على اشاعات! وإن المفروض الناس تتكلم عن المقارنة ديه لما يتم الكشف عن الجهازين بشكل رسمي. و Ryan أيضًا لم يرد على هل فعلا مايكروسوفت عندها افضلية في TFLOPS ولا لأ؟ و فضل يتجنب السؤال.

هل ده ممكن يبقى معناه إن Sony عندهم خطة أو جهازهم قوي بالفعل و التسريبات ديه خاطئة؟ وحسب اشاعة جديدة يبدو إن الـNeo هيبقى 5.5 TFLOPS مش 4.1 زي ما كان مشاع. و أيضًا ممكن Sony تكون قامت بتغير مواصفات الـNEO بعد الاعلان اللي مايكروسوفت عملته. بشكل عام احنا هنعرف كل حاجة قريب لأن من المتوقع إن الـNeo ينزل آخر السنة ديه أو بداية السنة القادمة و الكشف عنه هيبقى في سبتمبر.